2Ti 4 | KMG | STEP | No Anuture maio â Kristo Jesu, juku Wofuŋ tâpirihec fisirâ ɋâricne â hâmokicne dâŋnâŋec mutaraocmu, ere maio gazapaŋkepe manac:

2 Timothy 4

Pectâc juhuc miti gie ɋicwânšâŋ jaha bazo

1 No Anuture maio â Kristo Jesu, juku Wofuŋ tâpirihec fisirâ ɋâricne â hâmokicne dâŋnâŋec mutaraocmu, ere maio gazapaŋkepe manac: 2 Go miti muminširiŋkezemec, ehuc ŋic irec ejareha me mi ejareha ɋicwânšâŋ jaha jazazemec. Erâ ŋic mu tutuc â mu bâtiŋ â mu sawaŋ ejarehuc qaqazu giege uneŋko tatakic tâmiric bazemec. 3 Juku dameŋ moc maickeme miti riucdâŋ manapie joŋtaweme qikiŋneniŋmu. Qikiŋnerâ miti hazecte nâpene-jeŋic sawa eme qaqazu mana wosâc ejarepie maŋjeŋic sâckeme iŋucnea guruhec rocjopaniŋmu. 4 Ehuc mitidâŋ fârine râpeckerâ nemu binaŋko qohotaniŋmu. 5 Go ine dameŋ sâc maŋtiec juzemec, šârâ hâriŋzi faigao feme sanaŋkezemec, Biŋebiaŋ muromackezemec, gie mugarekicne i basarickezemec.

Paulo dameŋ-ticne bembeŋkewec

6 No ine biac due bazo ekopac, rara dameŋ-nane bembeŋkekac. 7 No juju gie biaŋ batarakopac, hata-nane âte wareku mao fisikopac, mamanasiŋ-nane soŋaŋkehape mi ŋeŋgoroŋkewec. 8 Eme ši sambâŋte eri hendiŋ biŋe-nane râekicne fokac, i juku dameŋ sâkoo Wofuŋ, mumutara tiŋne eki narezokac, erâ no sawa mâcne, fifisi-ticnere aŋac-jopaha jueŋgopieŋ jaŋe mâmâc jarezokac.

Ŋic gâcnezi Paulo behembiŋ

9 Go fâro barâ norao biac warezemec. 10 Dema e mâreŋkopec wiac irec mana kikiwerâ behecnurâ Tesalonike haeo fâwec, Kereske e Galatiao rawec, â Tito e Dalimatia mâreŋko fâwec. 11 Ʒi Lukahec buc jukoperec. Mareko jowatec mâmâc warezepirec. E giere sâcne baficnuocmu. 12 Tikiko ine sorepe Efeso haeo fâwec. 13 Warezo ehuc hata ŋaqi-nane Troa haeo Karpo ere ficko hetarapo i bawarezemec, erâ papia-nane qizecne â rehacne mâmâc amecke warezemec. 14 Aeŋzi wiac bapa ŋic Alesande e sâqocne bocjaha enarewec, irec Wofuŋzi juku okacne bazucneocmu. 15 Dâŋnâŋec mâretec ro waha âte ewec. Go ere sawaŋge qazemec. 16 Dâŋgie-nane bâbâni fuawec dameŋ ira âgo moczi dâŋte mi baficnuwec, aricne, jaŋe behecnu-fârembiŋ” kiŋjeŋic mi fojarezejec. 17 Wofuŋ eki ine miti musawe tarape qâpuc jaŋe mana-fâreniŋte dopecnurâ basanaŋnuwec, ehuc laioŋte mickonec bataracnuwec. 18 Wofuŋ e sâqocne irec me irec ŋezicnurâ sambâŋ uucmaŋ-ticnao râecnuocmu. Erao eri tatamac forahuc juzejec sanaŋ. Jâmbomac.

19 No Prisika â Aqila â Onesiforo wiacfâc-ticne mâmâc manasu-jare-fârekopac, i jazazemec. 20 Erasto e Korinti haeo juwec â Trofimo e huc bame Milete haeo hetarapo. 21 Go hoemaŋ dameŋ mi maickeha biac warezemec. Eubulozi manasu-garekac, erâ wâc Pudeŋ â Lino â Klaudia â âgo sasawa jaŋe iŋuc jaha manasu-gareŋgopieŋ. 22 Wofuŋzi maŋ qâqâtâcgehec juzejec. Aki anonoczi ŋoŋerao fozejec.